उगरा़ सारा सेंगेल Santhali Article
Santali Article उगरा़ सारा सेंगेल:- आबो रेन हापड़ाम कोदो तिमिनाङ पाराब पुना़य, छाता पाता, एनेज् सेरेञ, लेग-भेग, बोंगा-बोरो कोदो छा़तिक कोवाक् ञेल काते को धानबाद सिका़र पीड़ राजाक् उमुल रेको ताहें कान ओक्तो रेको चेत् आकावान ताहें काना। मेताक् मे बाहा, सोहराय आर गोमहा पाराब भेगेत् पाता पाराब, छा़तु कुँडा़ पाराब, राजा साकरात आर पुस साकरात पाराब एमान।
नोडे दो पुस साकरात रे उगरा़ सेंगेल रेयाक् खाटो माछा का़हनी काथा इञ ला़येत् काना। नितोङ-आक् लेखा जोखा ते पुस चाँदो दो सानताड़ होड़ होपोन कोवाक् मुचा़त् चाँदो काना। ओनाते सेरमा पुरा़व मुचा़त् चाँदो सेटेरेन खान को मेना मित् तिलमिञ जिवी आयसो ताबोन बाड़हाव आकाना, बाञचाव सारेच् होड़ जोम मित्, ञु मित् ञुतूम तेबोन पाराबोक्-आ।
नोवाँ पाराब रेयाक् माहाँ से मा़हित दो बा़नुक्-आ, नोवा दो जाहाँ तिस दिकु कोवाक् लेखा जोखा ते पुस चाँदो मुचा़दोक्-आ एने हिलोक् गे आबो हों बोन पाराबोक् काना। नोवा पाराब दो दिकु पुसी सानाम जा़ति रेन होड़ को मानोतेत् काना, जाहाँ गे आनटावोक् कुड़ावोक् गुड़, तिलमिञ, ताबेन, खा़जा़ड़ी, जिल, हा़कु, लेटो, जिल पिठा़, गुड़ पिठा़, तिलमिञ पिठा़ आरहों एमान-एमान को कुड़ा़व काते को जोम मिदा।
माड़ाङ हिलोक् दो आदवा चावले आ़रूप् आर तो़यो़ राक् से दिकु तेदो चाल धुँवा़ को मेताक् काना, दोसार हिलोक् दो बा़ँवडी होलोङ हुड़ूङ से दिकु तेदो गुणी कुटा आर आबो तेदो जिल, हा़कु, लेटो पिठा़, जोम-ञु, आर तेसार हिलोक् दो दिकु ते साकरात आबो दो गुड़ पिठा़ तिलमिञ पिठा़, खा़जा़ड़ी ताबेन जोम-ञु आर बेझा तुञ।
Santali Article उगरा़ सारा सेंगेल- साकरात दोसार पुनाक् हिलोक् दो आखान जातरा।ओनका गे बाँवडी हिलोक् सिका़र पिड़ राज रा़नी मोकोर मुनी ओड़ाक् रेयाक् गेच् गुरिच्, लुँडा़ पोताव चाबा बाड़ा काते तारासिञ बेड़ा बोंगा सापाब् डा़लिज्, हाटाक्, ढा़पनी आ़रूब् आ़गु आर उम बाड़ाक् हिजुक् मेनते ना़य घाट तेय चालाव लेना।
आदो बोंगा सापाब् हाटाक्, डा़लिज्, ढा़पनी को आ़रूब् बाड़ा काते उमुक् कान जोहोक् ओका लेकायेन चोङ ए आदोय उनुम डुबूज् गोज् उता़रेना। आ़डि घा़ड़िक हुयेन रेहों बाय रूवा़ड़ लेन खान को ञेल आ़गुयेदो बाङमाय उनुम डुबूज् गोज् उता़र आकाना। खान आदो चेद् बाङ को चिका़य नुना़क् जिल, हा़कु, लेटो, पिठा़ हा़ँडी को कुड़ाव आकाद् सानाम नारबा चाबाक्-आ।
खान राज ए मेन केदा, कुड़ाव आकाद् जोम-ञु बाबोन बा़रगिल होचोवाक्-आ, देलाबोन तेहेञ रेगे नुयाक् मा़णी दो मेटाव काते धुँवा़ छुत का़मी दोबोन चाबा काक् ताया। आदो बा़ँवडी हिलोक् ञिदा़ गे उनियाक् दोहोन का़मी साँवते छुवा़छुत का़मी दोको पुरा़व लेदा, उनुम डुबूज् घाट ढिप आड़े रेगे सारा को बेनाव केदा, ओना गे नेतोङ जाहाँ उगरा़ सेंगेल मेनते बोन मेताक् काना।
Santali Article उगरा़ सारा सेंगेल – ओना सारा रे उनि राज रा़नी मोकोर मुनियाक् माणा दोको रापाक् दोहोन केद् ते, उम नाड़का बाड़ाक् तेदो सिम को राक् गोद् केदा। आदो उम नाड़का काते ओड़ाक् को रूवा़ड़ेना, ओड़ाक् रे उनि मोकोर मुनी रा़नी बिदा़य ञुतूम ते मिद् सिम चिया़ब् को थापा केदेया।
दुवा़र के दुवा़र रेयाक् एतोम कोंये पाहटा रे थापा पोसाक् बोहोक् मायाङ को जोरोवादा आर कुलही दुवा़र रेदो को थापा मुचा़द् केदा। ओना गे नेतार हों बोन गोज् गुर लेनखान मोणा रापाक् से तोपा दोसार हिलोक् दो उनि सोज् एन भिंदा़ड़ेन बिदा़य ञुतूम मिद् सिम चिया़ब् गोज् सिम ञुतूम बोन गिडियेद् कोवा।
सिका़र पिड़ राज तिना़क् दिन दाड़े आर जिविद् ए ताहें काना, उना़क् दिन उनि मोकोर मुनी रा़नीयाक् उयहा़र ञुतूम ते बा़ँवडी हिलोक् ओना ना़य घाट रे उगरा़ साराय बेनावा। राज रेन सानाम गिदा़र पिदा़र सिम राक् ते इदि काते ओना उगरा़ सेंगेल को जुल तेको उम नाड़का हिजुक्-आ। रूवा़ड़ काते राज जाहाँ गेय कुड़ा़व आकाद् जोम-ञु, गुड़, गोतोम, पिठा़, खा़जाड़ी, ताबेन जोतो गिदा़र पिदा़र ए एमा कोवा।
ओनाते आदो नेतार हों छा़तिक जा़ति आर आबो होड़ होपोन रेन गिदा़र पिदा़र उन खोन को चेत् आ़गुवाकाद् ना़य घाट से पुखरी घाट रे उगरा़ सारा को बेनावा। ओना उगरा़ सारा रे सेंगेल को लागावा आर ओकोय तिना़क् धाव को उनुम डुबूज् दाड़ेयाक्-आ, मेनाको उना़क् गाँडा गे पिठा़ को एमा कोवा। उनुम डुबूज् उम नाड़का बाड़ा काते ओड़ाक् को रूवा़ड़ेन खान मिद् गोटाङ सिम पिया़ब् दुवा़र के दुवा़र रे को थापायेया, एनकाते दो पिठा़ खा़जा़ड़ी को आर हा़ँडी को-को जोम ञुया।
Written By:- Durga Prasad Murmu
[ratings]
