का़पी डुँगरी Santhali Article
Santali Article का़पी डुँगरी – आ़डि सेदाय रेयाक् काथा काना। जाहाँ दो पाले सोत जुग धारा धा़री हों हुय दाड़ेयाक्-आ। काथा रेयाक् घोटोन कोरे खोन बाडाय ञामोक् काना, जे ओना ओक्तो दो होड़ साँव बोंगा बोरो को ञेपेल रोपोड़ कान ताहें काना। आबो होड़ होपोन को गाङ ना़य पारोम काते दोखिन मोहडा को रेलाव चालावेना।
ओना ओक्तो रे जाँहाय जाहाँ ठाँव ए तेंगेन बेरेद् केद्-आ। आर आकोवाक् आ़पा़सुल रेयाक् का़मी होरा बीर बुरू को माक् टाँ़डी काते को बा़द् खेत को बेनाव आना। ओनका-ओनका तेगे धा़रिज् को टुडा़ङ तियुक् आकादा। आरहों पाले हापड़ाम को माड़ाङ सेद् को लाहा कोक् गेचोङ, सामाङ रे ओगोम दोरया तेको दाराम आकाना।
तोबे तेहेञाक् नोवा काथा दो नितोक् उड़िसा पोनोत रे मेनाक् मोयुरभोंज जिला रेयाक् बाबोनघा़टी-सबडिविजन रायरंगपुर थाना, गा़णदा़ पिड़ डाहारडी आ़तु रेयाक् घोटोन को इदि काते ला़युक् काना। नोवा डाहारडी आ़तु रेयाक् सुर साडगे आ़तु कोदो सामाङ सेहेद् रे खोंणबोंद, गुँडुरिया, इचा़क् घुटू, तायोम सेहेद् रेदो पुखुरिया़ एतोम सेहेद् रेदो बाँबड़े बुस, गा़ँभा़रिया़ आर कोञे सेहेद् रेदो पाते पा़नी मेनाक्-आ।
Santali Article का़पी डुँगरी – नोवा आ़तु दो को मेना सेदाय जोखोन भोंज राजा आर सा़रा़यकेला राजा किन पेड़ा लेन बेड़ा रे नोवाँ डाहार दो बेनाव आकाना। नोवाँ डाहार तेगे राज को हा़ती चेतान सादोम चेतान को हिपीरी कान ताहें काना। ओना तेगे पालेन मारे हापड़ाम को नोवाँ आ़तु दो डाहार आड़े रे मेनाक् ते डाहारडी को ञुम हालाङ आकादा।
पालेन नोवाँ आ़तु दो आबो होड़ बास्के पा़रिस कोको आ़तु चिया़ सार सा़गुन लाक्-आ। ओना ओक्तो दो नोवा दिसोम कोहों बुरू दिसोम गे ताहें काना। मानवाँ दो जाहाँ रेगे को आ़तु दिसोम जोतो लेकान सुबिधा ञेल काते को आ़तुया। नोवा आ़तु हों एतोम कोञे गाडा/ना़य ते एटेद् एसेद् आकाना। आर एतोम खोन कोञे सेद् ते मिद् डुँगरी तिंगु आकाना।
जाहाँ दो मोणे हा़टिञ रे हा़टिञ आकाना आर आ़तु खोन तायोम सेहेद् रे डुँगरी कोदो मेनाक्-आ। जेमोन एतोम सेहेदाक् ना़य/गाडा गुड़या़ गाडा खोन एहोब् एना, सोसो डुँगरी, डाँडो डुँगरी, बा़रसा़ डुँगरी आर बाहा डुँगरी जाहाँ दो खाड़ाङ गाडा/ना़य रे मुचा़द् आकाना।
Santali Article का़पी डुँगरी – आदो पाले उनकु बास्के पा़रिस होड़ कोदो नोवाँ जायगा दोमे को कुसीयाद् ते नोङकान ठाँव रे आ़तु को बेरेद् लाक्-आ। आर नोवाँ डुँगरी आड़े पासे को ढोडा ढिपा़ को सोमान काते बा़द् खेत को बेनाव लाक्-आ।
आर नोवा डाँडो डुँगरी आर बा़रसा़ डुँगरी ताला रे दो सोडोक् धारा ताहें ते बानार डुँगरी को आड़े मिद् केद् ते मिद्टा़ङ आहार को बेनाव केद्-आ। जाते आकोवाक् लातार सेदाक् बा़द् खेत को दाक् रेयाक् ओभाब आलो हुयूक् मा मेनते आर उम आ़रूबोक् खोन एहोब् काते हा़कु काटकोम को जोम ला़गिद् हों ला़कती दाड़ेयाक्-आ।
तोबे आबो होड़ होपोन दो जाहाँ रेगे बो ताँहेन ओना जायगा दो लाहा ते आ़तु चिया़ सार सा़गुन दोबो ञेल माड़ाङ गेया। नुकु होड़ हों ओना कोदो को ञेल लाक् गेया पाले। ओना तेगे तो तिना़क् साल जुग धा़रिज् को ताहें काना जोतोवाक् ते नापाय गेको ताहें काना पेरेज् आनेज्-धानेज् आर हेसेज्-सेकेज्। तोबे आबो होड़ दो बोंगा-बोरो कोदो बाको राग खान बाबो पेरेज् उमा़ड़ कोवा।
नुकु होड़ हों बोंगा बोरो कोदो को सेबा देबा लाद् को गेया। एनते रेहों जुदि बोंगा बोरो को आरहों जाँहानाक् को बाङ को कुसीयाक् खान आर बाङ को खोज खान जाँहानाक् आ़या़ दोको उदुग गेया आर ओनका तेगे डाँडो डुँगरी बोंगा होंय का़मीयेद् ताँहेद्।
आदो बासके होड़ाक् दिना़म आ़डि नापाय गे चालाक् कान ताहें काना आर हानते बोंगे-बोरो कोदो पाले चेद् कोचो को आँसोक् कान ओकोय बाडाया। एनखान बोंगा बोरो कोदो फोनदी को एहोब् केद्-आ। होय तो आसाड़ सान बोंगा हुय कोक् जाहाँ गे, दाक् को ताँहेन बेड़ा रेयाक् काथा।
ओना जे जाहाँ बाँद/आहार डाँडो आर बा़रसा़ डुँगरी ताला रे को बेनाव लाक्-आ। ओना दो दिना़म ञिदा़ दो फुड़ुक् कान ताँहेन। दिन बेड़ा बास्के होड़ को एसेद् ओटो काक्-आ आरहों ञिदा़ बेड़ा दो फुड़ुक्-आ। ओनका तिना़क् दिन गान चो चालाव एना। बाङ गे गानोक् कान ञेल ते बास्के होड़ कोदो दोमे को रा़गीयेन साँव तेको आ़ड़िसोक् ताँहेद्।
हेंदा या नोवा बाँद/आहार दो भाला दिना़म चेकाते रा़पुदोक्/भाँगाटोक् काना? आदो उनकु हों बोंगा काथा दो बाङ को आ़यका़व दाड़ेयाक काना। आदो फोंदी को गाक् केद् ते मिद् रा़गी आर धोपोट आर दिल दाड़े धारा बास्के होड़ दो ञिदा़ आहार ए होरहो आकाद्-आ। गोटा ञिदा़ भिता़र रे इखा़न चिली हों बाङ को हेज् लाना चे आड़े हों बाङ रा़पुद् लेना।
एनखान आरहों बाय होरहोया। आरहों जाहाँ हिलोक् बाय होरहोया ओना हिलोक् दो बाँद आड़े रा़पुद् कोक् काना दाक् को आँजेदोक् काना। आदो ओनका गे आरहोंय होरहो केद्-आ। ञुत काड़ाङ-कुचा़ङ सुणुज् थुम एकला चुमुल-चुमुल, एनहों रा़गी दाड़े ते का़पी आनतेय होरहो आकाद्-आ।
तोबे तेहेञ दोय ञाम केदेया मिद् होड़ ए हेज् एनाय आर आजाक् जाँगा ते ओना रा़पुद् भाँगाट जायगा रे बा़द् रा़क्पुद् ए छुटा़व आकाना। ओना ञेल काते उनि बास्के होड़ दो आ़डि आँट ए रा़गी चाबायेना। जाहाँ गे हुयूक् तापाम खोन मापाक् धा़रिज् मोनेय गोटा केद् ते बा़य-बा़य ते बाङ रासकाद् रोसकोद् काते ओंडेय सुर एना।
इना़क् ते मोनेय गोटा केद्-आ। बाङ-आ माक् उता़रिया़ञ। आर रा़गी ते का़पीय हाबाक् केद्-आ। जाहाँ लेकाय मागेया मेनते, उनि होड़ दो ओना का़पीय साब् दाराम केद् ते दोमे किन तापाम एना गाड़दा गुड़दु आर ओना का़पी दो बास्के होड़ ए रेज् ओचोयेना। जोखोन बास्के होड़ ए लाँगा चाबायेना उन झोक् उनि होड़ ए मेताय काना।
आपे दो ओकोय हों बापे उरूम कोवा ओकोयाक् काथा हों बाङ पे बुझा़व तियुगा। आले आपे ठेन खोन सेबा ले खोज काना आपे दो बापे ठिका़ दाड़ेयाक् काना। उलटा़ आले को मामाक् हों पे दिड़होक् काना। इञ दो होड़ दोञ बाङ काना इञ दो नोवा डाँडो रिनिज् बोंगा का़ना़ञ, आपेञ ञेलेद् पेया। तोबे इञ बाङ पे सेबा तियुक् इञ काना।
आपे दो नोवा ठाँव रे ताँहेन लेकान होड़ दोपे बाङ काना। आपे दो नित गे नोंडे खोन बा़गी काते नोवा सिमा़ बारहे उता़रोक् पे। आर बाङखान इञेम मागिञ कान लेका आपे एरा होपोन जोतोञ माक् खाचा बाचा पेया। नोवाँ ञिदा़ भिता़र ते नोवाँ डाहारडी बा़गीयाक् पे आर बाङखान चिली हों बापे बाञचाक्-आ। नोवा हों बाडाय काक् पे आपे बास्के होड़ दो तिस रेहों नोवाँ आ़तु रेदो बापे हेज् रूवा़ड़ केया बास्के पा़रिस तेदो।
एनखान उनि बास्के होड़ उनि बोंगा होड़ ठेन ए गोड जोहार बाड़ाक् कानाय मानाव ए ला़गिद्। बाय मानाव दाड़े आदे ते जिवी बाञचाव काते ञिर चालाव एनाय ओड़ाक्, आर ओड़ाक् रे जोतो होड़ ए ला़याद् कोवा नोवा घोटोन। आर ञिदा़ भिता़र रे एरा-होपोन, मिहु-मेरोम, गा़य-डाँ़गरी खोन एहोब् काते जाहाँ को गोक् दाड़ेयाद् लेकान सामान को गोक् केद् ते जिवी बाञचाव ला़गिद् ओना डाहारडी सिमा़ को पारोम केद्-आ।
ओनका ते पाले उनकु बास्के होड़ दे ओना सुर आ़तु पुखुरिया़, सिमड़ा़, मुरगा़, खोरोड़ दा इचा़क् घुटु आ़तु कोरे को बासा डेरायेन चोङ। तोबे हापड़ाम कोवाक् ला़य लेकाते आर ञेलोगोक् कान लेकाते पाले उनकु बास्के होड़ दो पुखुरिया़ रेको बासा डेरा डा़ँडी केद्-आ।
तोबे मिद् बार ओनोलिया़ दोको मेना बाङमा उनि बास्के पा़रिस होड़ दो ओना आजाक् का़पी तेगेय माक् गोज् ओचोयेना। जुदि नोङका हुय कोक्-आ, एनखान उनकु जे आ़तु रेको ताहें लेन सारेज् होड़ को एरा होपोन को नोवा जे आ़तु बा़गीयाक् खोबोर ओकोये ला़याद् कोवा?
आर मिद् ओना तायोम दाराम एटाक् होड़ को ओंडे खा़ली का़पी गेको ञाम केद्-आ, मेनखान बास्के पा़रिस होड़ाक् गोज् होड़मो दो बाङ ञाम लाना? नोवा दो आ़डी सा़री बाय आ़यका़वक् काना।
इञाक् तोलास ते हापड़ाम कोवाक् ला़य लेकाते ओंडे दो उनि डा़डी बोंगा आर बास्के होड़ दोमे किन नेयाव खा़पा़रिया़वेन साँवते सापाब् तापाम एना किन आर जोखोन बास्के होड़ ए लाँगायेना, नोवा को काथाय ला़याद् ते आ़तु खा़ली काते ञिदा़ भिता़र रे ओना सुर साड़गे रेगे को बासा बाड़ायेना। जाँहाय जाहाँ सेद् को ञिरेन लाँगा मुचा़दोक् आर बोतोर चाबाक् धा़रिज् को ञिरेना। ओनाते ओना आड़े पासे कोरे को बासायेना।
तोबे उनकु बास्के कान गेया को मेनते दो नोवा ते बाडायोक् काना जाहाँ तिस आबगे बोंगा/गोड़ा बोंगाक् बेड़ा दो आकोवाक् जोतोवाक् बोंगा सापाब् साँव दाणे को ओना बाँद चे आहार रेगे दाणे उम फा़रचा़ नाड़का फुरचा़क् ते, दाणे कोहों को उम कोते का़पी तारवाड़े को हाटाक् डा़लिक् को आ़रूब् साफाया।
आर ओंडे खोन गे घोट दाक् को इदिया आर सिंगा़ड़ बेड़ा बोंगा को ओडोकोक्-आ। ओनका का़मी काते तेहेञ धा़रिज् उन खोन मेनाक् कोवा आ़डि नापाय ते। जुदि उनि डाँडो बोंगा उना़क् ए आ़ड़िस कोक् खान चे माक् गोज् उता़र के खान तेहेञ धा़रिज् नोवा नोङका चेकाते को बोंगा बुरूक् काना। आर नाय ते नापाय ते मेनाक् कोवा।
नितोक् लेका तेदो ओंडे पुनया़ बाँद/आहार मेनाक्-आ। जोतो खोन चेतान उता़राक् दो बास्के जाहेर को मेतागाक्-आ। हापड़ाम कोरे खोन काथा आँजोम आकाना मिद् धाव चेलेन ओना बाँद रे दिसवा़ हा़कु साब् बेड़ा रे बास्के पा़रिस होड़ ए झा़ली लाना। तोबे दिसवा़ को बोंगा को नेहोर लादेया जे नुय दो आज् तेदो बाय हेज् आकाना आले गेले आ़गु आकादेया इका़ काय मे। एनखान उनि बास्के पा़रिस होड़ ए बाञचाव एना।
जोखोन बास्के पा़रिस होड़ ओना आ़तु को बा़गीयाद्-आ ओना तायोम ओका खोन दो मुर्मू पा़रिस होड़ हेज् काते ओना बास्के होड़ाक् जोतोवाक् को आकोवाक् केद्-आ। ओनका ते जुग हों पारोम इदियेना ओना डाँडो डुँगरी हों ओना का़पी को ञाम केद् खा़तिर का़पी बोंगा नोंडे दो मेनाया मेनते उनकु होड़ाक् पा़तया़व हेज् एन।
ओना का़पी डुँगरी बाङ का़पी बुरू ञुतुम ते बिका़व एना। आसोल रेदो उनि बोंगा दो का़पी बोंगा दोय बाङ काना उनियाक् ञुतुम दो बाङ ला़य कोक्-आ। ओनका ते राजा ओमोड़ को पारोम इदियेना। बिर पोनोत रे टाटा बाजार बेनाव एना आर नोंडे भोंज दिसोम हों उड़िसा पोनोत एनते बा़रपादा बाजार बेनावेन खान ओना राजा डाहार हों ञुतुम बोदोलेना टाटा-बा़रपादा आर उड़िया़ पोनोतेन ते उडिया़ आड़ाङ ते डाहारडी हों डाँडबुस ञुतुम आकाना।
Santali Article का़पी डुँगरी – नोङका ते तेहेञ धा़रिज् हों जाहाँ ञिर बाञचाव आकान बास्के पा़रिस होड़ आर बाङ नोङकान घोटोन बाडाय आकाद् बास्के पा़रिस होड़ दो ओना डुँगरी आहार डा़डी कोरे दो एकला तोकला बाको सेन बाड़ाक्-आ।
आर बास्के पा़रिस होड़ रिन होपोन एरा कोदो ओना आ़तु रेको ठाँव बाड़ा आकाना उनकु दो जाँहान एटके टोणे बाय हुय आकाना तोबे तेहेञ नोवा हुडिञ-हुडिञ काथा गे नोङका ला़युक् रेयाक् कारोन दो आबो होड़ होपोन कोयिज् बाञचाव गुरू, ओल गुरू, लाकचार गुरू, धोरोम गुरू, खेलोंड गुरूवाक् जानाम ओना बास्के पा़रिस थापोनाक् आ़तु रे हुय आकान ते आर ओना डाँडो डुँगरी कोरे धेयान का़मी को हुय आकान ते नोवा डाँडो डुँगरी बाङ का़पी डुँगरी दो आबो सानताड़ साँवता रे का़पी बुरू मेनते आ़डि माराङ ठाँव ए आमेट आकाद्-आ।
आर नोवा हों जोतो बो बाडाया गुरू बाबायिज् ओड़ाक् एरा दो बास्के पा़रिस कुड़ी गेय ताहें काना। तोबे जाँवाय काते मा पा़रिस बोदोलोक् तेय मुर्मू लाना। आर जाँहाय होड़ाक् जाँहान का़मी रे जितका़र तायोम रे एरा होड़ाक् हों आ़डि माराङ गोड़ो ताँहेना। होय तो उनि बोंगा दो बास्के पा़रिस कोदो एगेर तेगे एगेर लाक् कोवाय।
मानाव लेखान मानाव कोक् गेचोङ। तोबे काथा रे मेनाक् जाँहानाक् गे हुयूक्-आ ओना दो भा़गीयाक् गे हुयुक्-आ आर जाहाँ हुयुक्-आ ओना हों भा़गी गे हुयुक्-आ। उन बेड़ा उनि डाँडो बोंगा आर बास्के पा़रिसाक् नेयाव खा़तिर ओना भा़गी ठाँव बास्के होड़ को आड़ाक् केद् ते मुर्मू होड़ को दोखोल केद्-आ।
Santali Article का़पी डुँगरी – आर मुर्मू होड़ाक् का़मी ते तेहेञ आबो होड़ होपोन खेरवाड़ बोङसो, सानताड़ सा़त दिसोम रे उपरूम बो ञाम आकाद्-आ। ओना रेदो खा़ली मुर्मू सुमुङ दो बाङ बास्के हों साँव मेनाय गेया।
नोवा काथा घोटोन को रेयाक् जोस तेद् दो तेहेञ बो ञेला। बास्के होड़ इदि काते डाँडो डुँगरी, मुर्मू होड़ इदि काते का़पी डुँगरी आर गुरू गोमकेयाक् का़मीहोरा ते का़पी बुरू लेकाते आबो साँवता रे आ़डि नामडाक बिका़क् काना, तोबे काथा दो नोवा। नोवा का़पी बुरू सालाक् जोनोड़ाव आबोवाक् का़मीहोरा को आबो तिना़क् बो आपनारा, उना़क् लोगोन गे आबो जा़ति, धोरोम, साँवता आर साँवहेद् एटाक् लाहान्ती साँवता सालाक् पानतेनोक्-आ।
Written by – Laxman Baskey
[ratings]
